४ कार्तिक, काठमाडौं । नेपाली कांग्रेस लुम्बिनी प्रदेशका सभापति अमरसिंह पुनले गौतम बुद्धको जन्मस्थल लुम्बिनी प्रदेशलाई देशकै आर्थिक हव बनाउन सकिने बताए । अन्तर्राष्ट्रिय रोल्पाली सेवा समाजको दोस्रो अधिवेशनलाई सम्बोधन गर्दै सभापति पुनले प्रदेश सरकार र संघीय सरकारको साझेदारीमा उपयुक्त गुरुयोजना बनाएर लुम्बिनीको आर्थिक गतिविधिलाई थप चलायमान बनाउनु पर्नेमा जोड दिएका छन् ।
सभापति पुनले गौतम बुद्धको जन्मस्थल समेत रहेको लुम्बिनी प्रदेश प्राकृतिक सौन्दर्यले भरिपूर्ण रहेको बताउदै यसको प्रचारप्रसार तथा प्रबर्द्धनले पर्यटनको वृद्धि हुनेमा जोड दिए ।
प्रदेश सभा २ रोल्पाका प्रदेश सभा सदस्यका उम्मेदवार समेत रहेका पुनले युवाहरूलाई उद्यममा आकार्षित गर्न राज्यले उद्यम मैत्री वातावरण निर्माण गर्नुपर्नेमा जोड दिएका छन् । कृषिको आधुनिकीकरण र पर्यटन क्षेत्रको विकासले युवाहरूलाई नेपालमै स्वरोजगार बनाउन सकिने बताएका छन् ।
युवाहरू राष्ट्र निर्माणका साझेदार र महत्वपूर्ण सम्वाहक भएकाले युवाहरूको सहभागीता र नेतृत्वले मात्र समृद्ध नेपालको आधारशिला खडा हुने उनले बताए ।
